“Tarix” kafedrasi Navoiy davlat pedagogika instituti rektorining 2015-yil 28-fevraldagi 74 AFO-buyrugʻi asosida Tarix fakulteti “Oʻzbekiston tarixi” va “Umumiy tarix” kafedralari birlashtirilishi negizida tashkil etilgan. 2015-yil 28-fevraldan t.f.n.X.R.Qurbonov, 2015-yil 26-avgustdan t.f.n., dotsent R.M.Qarshiyev, 2018-yil 27-avgustdan 2024-yil 25-noyabriga qadar t.f.d. (DSc), dotsent A.M.Aminova kafedraga mudir lavozimida ishlagan.
“Tarix” kafedrasi mudiri lavozimida 2025 yil 20-yanvardan p.f.f.d.(PhD), dotsent Sh.S.Boboyorov faoliyat yuritmoqda.
Kafedraning maqsadi.
Kafedraning asosiy maqsadi — talabalarga tarix fanlari bo‘yicha puxta nazariy va amaliy bilim berish, ularda tarixiy tafakkur, ilmiy dunyoqarash, milliy va umuminsoniy qadriyatlarga hurmat tuyg‘usini shakllantirish hamda zamonaviy pedagogik va raqamli texnologiyalardan samarali foydalana oladigan raqobatbardosh mutaxassislarni tayyorlashdan iborat.
Kafedraning vazifalari.
— tarix fanlari bo‘yicha zamonaviy va sifatli ta’lim jarayonini tashkil etish;
— talabalarning tarixiy manbalar bilan ishlash, tahlil qilish va xulosa chiqarish ko‘nikmalarini rivojlantirish;
— O‘zbekiston va jahon tarixini xolis, ilmiy va tizimli o‘rganishga yo‘naltirish;
— talabalarda vatanparvarlik, milliy o‘zlikni anglash va tarixiy merosga hurmat tuyg‘usini shakllantirish;
— zamonaviy pedagogik texnologiyalar, interfaol metodlar va raqamli vositalarni ta’lim jarayoniga joriy etish;
— talabalarni ilmiy-tadqiqot faoliyatiga jalb etish, maqola, tezis va loyihalar tayyorlashga ko‘maklashish;
— iqtidorli talabalarni aniqlash va ularning ilmiy hamda kasbiy salohiyatini rivojlantirish;
— professor-o‘qituvchilarning ilmiy-uslubiy va kasbiy mahoratini muntazam oshirib borish;
— tarix ta’limi bo‘yicha o‘quv-uslubiy qo‘llanmalar, darsliklar va elektron resurslar yaratish;
— mahalliy va xorijiy ta’lim hamda ilmiy muassasalar bilan hamkorlikni rivojlantirish.
2025-yil 20-yanvardan boshlab “Tarix” kafedrasi mudiri lavozimida pedagogika fanlari bo‘yicha falsafa doktori (PhD), dotsent Sh.S. Boboyorov faoliyat yuritib kelmoqda.
U kafedra faoliyatini zamonaviy ta’lim talablari asosida tashkil etish, o‘quv jarayonining sifat va samaradorligini oshirish, professor-o‘qituvchilarning ilmiy-uslubiy salohiyatini rivojlantirish hamda talabalarning kasbiy kompetentligini mustahkamlashga alohida e’tibor qaratmoqda.
Kafedra rahbari Sh.S. Boboyorov tomonidan tarix ta’limiga zamonaviy pedagogik texnologiyalar, interfaol metodlar va raqamli vositalarni joriy etish, o‘quv-uslubiy ta’minotni takomillashtirish hamda talabalarning tarixiy manbalar bilan ishlash, tahlil qilish va tadqiqotchilik ko‘nikmalarini rivojlantirish bo‘yicha izchil ishlar olib borilmoqda.
Shuningdek, kafedrada ilmiy-tadqiqot faoliyatini rivojlantirish, professor-o‘qituvchilar va talabalarni konferensiya, seminar va loyihalarga jalb etish, ta’lim muassasalari, muzeylar va arxivlar bilan hamkorlikni kengaytirishga e’tibor qaratilmoqda. Bugungi kunda “Tarix” kafedrasi ta’lim, ilm-fan va amaliyot integratsiyasi asosida zamonaviy bilim va tarixiy tafakkurga ega mutaxassislarni tayyorlash yo‘lida faoliyat olib bormoqda.
“Tarix” kafedrasida 2024-2025 oʻquv yilida 42 nafar professor-o‘qituvchilardan 32 nafari asosiy shtatda, 7 nafari ichki o‘rindoshlik asosida va 1 nafari tashqi o‘rindoshlik asosida ishlab kelmoqda. Ularning 5 nafari professor, 14 nafari dotsent, 5 nafari tarix fanlari bo‘yicha falsafa doktori (PhD), 1 nafari falsafa fanlari bo‘yicha falsafa doktori (PhD), 4 nafari katta o‘qituvchi va 14 nafari o‘qituvchi sifatida talabalarga ta’lim berib kelmoqda. Kafedra professor-oʻqituvchilarining 40 foizini ayollar tashkil qiladi.
2024-2025 oʻquv yilida kafedra professor-oʻqituvchilari tomonidan 60111100 – “Tarix”, 60111100 – “Tarix, qoʻshimcha davlat huquqi”, 5110600 – “Tarix” ta’lim yoʻnalishlari bakalavriat va 701101101– “Ijtimoiy-gumanitar fanlarni oʻqitish metodikasi (Tarix)” mutaxassisligi boʻyicha magistratura talabalariga 27 ta fandan ta’lim berilmoqda.
2024-2025 o‘quv yilida “Tarix” kafedrasi professor-oʻqituvchilarining ilmiy salohiyati 41 % ni tashkil etib, ular tomonidan 1 ta – Scopus; 5 ta — Web of Science; 17 ta — Impakt faktori yuqori bo‘lgan ilmiy jurnallarda; 26 ta — OAK tasarrufidagi jurnallarida, 123 ta — xalqaro va respublika konferensiyalarida ilmiy maqola va tezislari chop etildi. T.f.d. (DSc) A.Aminova tomonidan “История экономических преобразований в Узбекистане в 1991-2021 гг. (на примере областей низовья Зарафшана)” nomli monografiya nashr etildi. Kafedrada faoliyat olib borayotgan 7 nafar professor-oʻqituvchilarning maqolalari “Xirsh” indeksi (H-index)da yuqori koʻrsatkichlarda indeksatsiyalangan.
Tarix kafedrasining amaliy o‘quv muhiti talabalarning nazariy bilimlarini amaliy faoliyat bilan uyg‘unlashtirishga yo‘naltirilgan. Ushbu muhitda talabalar tarixiy manbalar, arxiv hujjatlari, xaritalar, muzey materiallari va raqamli resurslar bilan ishlash orqali tarixiy voqea-hodisalarni mustaqil tahlil qilish, taqqoslash va ilmiy xulosa chiqarish ko‘nikmalarini rivojlantiradilar.
Amaliy mashg‘ulotlarda interfaol metodlar, tarixiy keyslar, loyiha ishlari, taqdimotlar, munozaralar, virtual sayohatlar va raqamli tarix vositalaridan foydalaniladi. Shuningdek, talabalar muzeylar, arxivlar, tarixiy obidalar va ilmiy muassasalarda o‘tkaziladigan amaliyotlar orqali kasbiy tajriba orttiradilar.
Bunday o‘quv muhiti talabalarda tarixiy tafakkur, manbashunoslik ko‘nikmalari, tadqiqotchilik kompetentligi, mustaqil fikrlash va zamonaviy raqamli vositalardan foydalanish malakasini shakllantirishga xizmat qiladi.